له‌دووره‌وه بۆ ژنه‌کان ده‌ڕوانم ... دڵـــی ڕۆژهــه‌ڵات
چیم بینی
نیشتمان وا له‌سه‌ر هه‌ور و
له‌ژێر پێی ئه‌واندا
باران ده‌بارێنێ،
زه‌وی پڕ ده‌کات له‌خۆی و نه‌ستی ئه‌وان و
ژێر پێیان ته‌ڕ ته‌ڕ ده‌کات
به‌فرمێسکی خۆی.
هه‌موو ته‌ڕی ئه‌وان
به کزه‌بایه‌ك ده‌بێته
پارچه‌یه‌ك له سه‌هۆڵ و
گه‌رمی ئه‌وان سارد ده‌کاته‌وه
و
ژنه‌کان ده‌کات به پارچه‌یه‌ك له میهر و
ده‌ریایه‌ك له شه‌پۆل و
ئاسمانێکی نه‌وڕه‌س ئاسا
له‌داێک ده‌بێ.
له‌گه‌ڵ وه‌رینی په‌ڕه‌ی گوڵێكدا
خه‌می ئێمه‌ی ژنیش له دایك ده‌بێ و
له‌گه‌ڵ فرمێسکی هه‌وردا
خه‌می منی ژن ئاساش
ده‌وه‌رێ.
له تاریکی شه‌ودا
مۆمی ژنبوون و
که‌رۆژی رووناکیکشدا
گڵۆپی ژنبوون
داده‌گیرسێ.
دوای زریکه‌ی خه‌ڵوه‌تی ژنێ
له باوه‌شی نه‌گریسدا
دوای فرمیشکی
هه‌واری پر ده‌کات له‌بۆن و
دڕك ون ده‌بێ و
هه‌ور داده‌کات له‌فرمێسکی خۆی تا نیشتمانی ژن بشواته‌وه.
ژن نانی خه‌مه و
به‌رگی هه‌ژاری ئه‌دگاری داپۆشیون و
سكپڕن به‌ئازار.
هۆ ژنه ده‌م وشکه‌که
له‌پێش حه‌وا و ئاده‌م
به‌رگی ئازار و
خه‌م
دابنێ،
تا تێبگه‌ن
دوای ئه‌وان ڕه‌گه‌زی تۆ
چۆن پڕ بووه
له‌کوشتن،
ڕه‌گه‌زی تۆ چۆن پڕبووه
له‌شه‌نگال و کۆبانێ و هه‌ڵه‌بجه
چۆن ڕه‌نگیان کاڵ بۆته‌وه.
له‌ئاسمانی من و تۆدا
نه‌ره‌سه‌کان
پۆل پۆل ده‌وه‌رن به‌سه‌ر کێڵگه‌ی پڕ له‌بزمار ئاسا.
ئه‌و بابه‌تانه‌ی له کوردستان نێت دا بڵاوده‌کرێنه‌وه، بیروبۆچوونی خاوه‌نه‌کانیانه، کوردستان نێت لێی به‌رپرسیار نییه.