ته‌نیا مانگێكه خانمه رۆژهه‌ڵاتییه‌كه ده‌رگای ماڵه‌كه‌ی خۆی "ماڵی هونه‌ر" له‌هه‌ولێر كردۆته‌وه، به‌ڵام كۆكردنه‌وه‌ی كه‌لوپه‌ل و دیزانی ناو ماڵه‌كه یه‌ك ساڵی خایاندووه، خاوه‌ن ماڵه‌كه‌ش له‌م چاوپێكه‌وتنه‌یدا له‌گه‌ڵ (سڤیل) رایده‌گه‌یه‌نێت، ئێستاش نۆره‌ی هونه‌رمه‌ندانه بێن ماڵه‌كه‌ی ئاوه‌دان بكه‌نه‌وه.
رۆژیار، كه خاوه‌نی ماڵه‌كه‌یه، خانمێكی ده‌ستڕه‌نگینی رۆژهه‌ڵاتییه و بڕوانامه‌ی به‌كالۆریۆیسی له‌بواری دیزاینی جلوبه‌رگدا هه‌یه و چه‌ند ساڵێكیش له‌بواری دیزاینكردنی جلوبه‌رگی سینه‌مایی له‌ئێران كاری كردووه. ماڵه هونه‌رییه‌كه‌ی له نزیك گه‌ڕه‌كی رۆناكی، له‌سه‌ر شه‌قامی 100 مه‌ترییه، وه‌ك جۆرێك له كافتریایه بۆ هونه‌رمه‌ندان. ئه‌و له‌نێو ماڵه‌كه‌ی خۆی "ماڵی هونه‌ر" پێشوازی له (سڤیل) كرد و بیرۆكه‌ی چۆنیه‌تی دروستكردنی ئه‌م ماڵه‌ی باسكرد و گوتی "له‌كوردستان به‌تایبه‌ت له‌هه‌ولێر ماڵێك نه‌بوو هی هونه‌رمه‌ندان بێت، بیرم كرده‌وه ماڵێك دروست بكه‌م هونه‌رمه‌ندان به‌هی خۆیانی بزانن و هه‌موویان له‌ماڵێك كۆببنه‌وه و نه‌چن بۆ شوێنێك، كه شوێنی ئه‌وان نییه، بۆئه‌وه‌ی ئه‌گه‌ر كارێكیان هه‌بێت لێره ئه‌نجامی بده‌ن، ئه‌گه‌ر نمایشی شانۆگه‌رییه‌ك بێت، یاخود ئاهه‌نگێكی موزیك، گه‌له‌رییه‌ك، هه‌تا ئه‌گه‌ر هونه‌رمه‌ندێك هه‌ست به‌بێتاقه‌تی بكات ده‌توانێت بێن لێره دانیشێت وه‌كو ماڵی خۆی هه‌ست به‌ئارامی بكات، هه‌روه‌ها شوێنێك بێت بۆ بیرۆڕا ئاڵۆگۆڕكردنی هونه‌رمه‌ندان و په‌یوه‌ندی دروستكردن له‌گه‌ڵ یه‌كتر بۆ پڕۆژه‌كانیان و به‌یه‌كه‌وه كاركردن". بۆیه رۆژیار ره‌تی ده‌كاته‌وه بۆ بازرگانیكردن ئه‌م كاره‌ی كردبێت و ئاماژه بۆ ئه‌وه ده‌كات، تائێستا داهاتی نه‌بووه و پاره‌ی كرێی خانووه‌كه‌شی نه‌هاتۆته‌وه. هه‌روه‌ها گوتیشی "من یه‌ك ساڵ له‌هه‌ولێر شوێن به‌شوێن گه‌ڕاوم تاوه‌كو ئه‌م كه‌لوپه‌لانه‌م كۆكردۆته‌وه و خۆشم ئێره‌م دیزاین كردووه، ئه‌وانه‌ی من لێره دامناوه له‌هیچ شوێنی دیكه نییه".
له‌ماوه‌ی ئه‌م مانگه‌دا وه‌ك رۆژیار ئاماژه‌ی بۆ ده‌كات، چه‌ند چالاكیه‌كیان ئه‌نجامداوه، وه‌ك: "كارێكی سینه‌مایی فیلم نمایشكردن، نمایشێكی شانۆیی بۆ كۆبانێ به‌ناوی (ژیان بۆ كۆبانێ)، هه‌روه‌ها كۆڕێكی شیعریی". بۆ پرۆژه‌ی داهاتووشیان رۆژیار گوتی "له‌رۆژی جیهانی موزیك و شانۆ، له‌شه‌وی یه‌ڵدا و رۆژی ئافره‌تان و رۆژی سینه‌ما چالاكیمان ده‌بێت، جگه له‌وانه‌ش بڕیاره یه‌كێك له پڕۆژه‌كانی دروستكردنی ماسك بۆ كچ و كوڕان لێره ده‌ست پێبكات".
ئه‌گه‌ر شانۆكارێك بیه‌وێت له‌م ماڵه شانۆیه‌ك بكات، پێویسته له‌سه‌ر شانۆیی مۆدێرن كار بكات، چونكه ماڵه‌كه‌ی ئه‌وان بچووكه و شوێنی حه‌فتا كه‌س ده‌بێته‌وه، مه‌رجی ئه‌وانیش بۆ هه‌ر هونه‌رمه‌ندێك ئه‌وه‌یه "ته‌نیا كه‌سه‌كه هونه‌رمه‌ند بێت و كاره‌كه‌ش غه‌یری ئه‌خلاقی نه‌بێت". ئه‌وانیش بۆ هه‌ر چالاكییه‌ك بلیت ده‌فرۆشن.
رۆژیار، به‌یانیان خه‌ریكی كۆكردنه‌وه‌ی هه‌موو جله كوردییه كۆنه‌كانه، هی هه‌موو ناوچه‌كان، ئه‌وانه‌شی دڕاون چاكیان ده‌كاته‌وه و لای خۆی ده‌یانپارێزێت. ده‌شڵێت "ئێواران سه‌عات چوار ماڵه‌كه‌م ده‌كه‌مه‌وه بۆ هونه‌رمه‌ندان و ئاماده‌م له‌گه‌ڵیان دابنیشم".
ئه‌و خاوه‌ن ماڵه داوای هاوكاری و پاڵپشتی له‌هونه‌رمه‌ندان ده‌كات، تاكو بچنه ماڵه‌كه‌ی و هه‌مووان به‌یه‌كه‌وه ئاوه‌دانی بكه‌نه‌وه و ده‌ڵێ "داوا ده‌كه‌م وا بیر بكه‌نه‌وه ئێره ماڵی خۆیانه، ئه‌گه‌ر وا بیر بكه‌نه‌وه هه‌وڵده‌ده‌ن یارمه‌تیم بده‌ن، من له‌به‌ر خاتری ئه‌وان و خۆشه‌ویستی هونه‌رمه‌ندان ئه‌م كاره‌م كردووه".
رۆژیار پێشئه‌وه‌ی به (سڤیل) بڵێت قسه‌كانم ته‌واو، گوتی "دوا قسه‌ی من ئه‌وه‌یه كاركردن بۆ ئافره‌ت لێره زۆر قورسه، له‌به‌رئه‌وه‌ی من ئافره‌تم و به‌ته‌نیا كارده‌كه‌م، بۆ ژن ئاسان نییه كاری چیمه‌نتۆ بكات و كاره‌با راكێشێت و باخچه دروست بكات و دیزاینی ناوماڵ ئاماده بكات، مالێكی ئاوا به‌ڕێوه ببات، به‌ڵام هه‌موو شتێك هه‌وڵدانه بۆ گه‌یشتنه به‌ئامانج، من بۆ ئامانجێك كارده‌كه‌م، ئه‌ویش خزمه‌تكردنه به هونه‌رمه‌ندان".
ئه‌و بابه‌تانه‌ی له کوردستان نێت دا بڵاوده‌کرێنه‌وه، بیروبۆچوونی خاوه‌نه‌کانیانه، کوردستان نێت لێی به‌رپرسیار نییه.