لە کۆمەڵگەیەکى پەرۆشى پێشکەوتن و گۆڕانکارى دروست، هەمیشە هۆشمەندى رووناکبیران، زۆرترو پڕتر پەى بە کەم و
کوریەکان دەبەن و بەنێو کون و کەلەبەرەکانى ژیانى کۆمەڵگە و دامەزراوەکانى و بەرهەمە هزرییەکانیدا رۆ دەچن لەبەر رۆشنایى و بنەماى تیۆرى و ئەزموونە ناوەکى و دەرەکییەکاندا لە دەم شیتەڵ و شیکردنەوەیەکى زانستیانەدا تیشک دەخەنە سەر کەم و کورییەکان.ئەم پرۆسەیە دەبێتە رەخنەو لە پشتى رەخنەسازى دروستیشەوە، مەبەست پاکى رەخنەگر لە چۆنیەتى بەرجەستە کردنى چۆنیەتى گۆڕانکاریدا خۆى دەنوێنێت، تا بەرهەم و پەیوەندییەکى گونجاوتر و شیاو تر پێشکەش بکرێت.وەلێ بە تایبەت لە ماڵپەڕە کوردییەکاندا زۆربەى بابەت و نووسینەکان کە لە ژێر ناوى رەخنە بەرامبەر کەم و کوڕییەکان بڵاو دەکرێتەوە بە ئاقارێکى دوور لە رەخنەسازیدا دەڕۆن و رێچکەى بەرەو ئاڵۆزى و گۆڵمەزێکى ناپەسەندى وەها دەگرن کە سوودێکى بۆ کۆمەڵ و تەواوى گۆڕانکارى لە بەرهەم هێنانەکاندا نەبێت، نەک هەر ئەمە بەڵکو سنوورى خوێندنەوە و نزیکبوونەوەى کوردان لە ماڵپەڕە کوردییەکان تەسک دەکەنەوە و دەکرێت بڵێین رێ خۆشکردن و هاندانى جۆرێک لە خراپ بەکارهێنانى تەکنەلۆژیا دەڕەخسێنێت، رەخنەگر دەبێت بێ لایەن بێت لەرەخنەسازى و هەڵسەنگاندنەکانیدا بەو واتایەى شیاوى لەوەدا نابینرێت رەخنەگر، رەخنە لە سنوور و بەرژەوەندێکى تەسکدا بەکار بهێنێت.رەخنەگرى بە ئاگا، هەر بابەتێک تاوتوێ دەکات کەمتر کەسانى دى پەى بە کەم و کورییەکانى دەبەن.سووڕانەوەى رەخنە لە ئاکارە کەسیەکاندا و هەڵسەنگاندنەکانى بە تەنیا لە روانگەى رووکەش ناسییەوە نابێتە جێى پەسەند بوون وسەرکەوتنێکیش بەدەست ناهێنێت.سەرکەوتنى رەخنەو هەڵسەنگاندنى رەخنەیى لە رۆچوونى هەمەلایەنەى بەرهەم و پەیوەندییەکاندایە، دیارە ئەمەش لە رەخنەگردا ئەو پێداویستیانە زاڵ دەکات کە دەبێت رەخنەگر بۆ بابەتێکى رەخنەیى، رووناکبیرییەکى فراوان و بەدوواچوونى هەمیشەیى لەسەر مێژوو و ئاستەکانى ئەمڕۆى جیهانیدا هەبێت، تا بتوانێت ئەمانە هەموو بکاتە بەڵگەو پشتگیرى سەرکەوتنى رەخنەکان.گەر بەو جۆرە نەبێت بە تەنیا پلار هاوێشتن و داڕووشانى بەرامبەر و رەخنەى سەرپێیى بێت، ناچێتە دووتوێى رەخنەیەکى پڕ سوودەوەو جگە لە سنوور بەزاندنى رەخنەسازیى زانستى بەولاوە چیتر نیە، سەربارى ئەوەى وەک قۆناخ، ئاستێکى بەرزى هزر و نووسین چ لە ئێستادا یاخود بۆ ئایندە و نەوەکانى داهاتوو نیشان نادات.
ئه‌و بابه‌تانه‌ی له کوردستان نێت دا بڵاوده‌کرێنه‌وه، بیروبۆچوونی خاوه‌نه‌کانیانه، کوردستان نێت لێی به‌رپرسیار نییه.