داواکارییەکی دڵسۆزانەو کراوە لە سەرکردایەتی یەکێتی شۆڕشگێڕانی کوردستان، بۆ پارتی و گۆڕان و یەکێتی نیشتمانی کوردستان
بە سەرنجدان بە هەلوومەرجی سیاسی_ ئابووری و ئەمنی باشووری کوردستان بە گشتی و هەنگاونان بەرەو پێکهێنانی کابینەی هەشتەمی حکومەتی هەرێمی کوردستان و هەڵبژاردنی ئەنجۆمەنی پارێزگاکانی عێراق و پەڕڵمانی عێراقی بە ناو فیدراڵ، دەبێت ئەوە بزانین کە ناحەزانی پرۆسەی دیموکراتیزەکردنی باشووری کوردستان بە گشتی و دەزگا سیخۆڕییەکانی کۆماری ئیسلامی ئێران، ئەوەی لە دەستیان بێت دەیکەن .
هەر لەو پەیوەندییەدایە کە کومیتەی ناوەندی یەکێتی شۆڕشگێڕانی کوردستان، وەبیر هەموو لایەکی دەخاتەوە تێرۆریست دیپڵۆماتەکانی کۆماری ئیسلامی ئێران چەن رۆژێک لەمەو بەر هاتنە باشووری کوردستان و داوایان لە سەرکردایەتی سیاسی باشووری کوردستان کرد بۆ دواخستنی پێکهێنانی کابینەی هەشتەمی حکومەتی هەرێمی کوردستان، بەڵام زۆر بوێرانەو کوردانە، بەرەو رووی وڵامی " نا " ی سەرکردایەتی سیاسی باشووری کوردستان بوونەوە .
کەوا بوو، لەم هەلوومەرجەدا، دامودەزگا ئەمنییەکان و هێزەکانی ئاسایشی پاراستنی کوردستان دەبێت وریای کردەوە تەخریبی''تێکدەرانە'' و ئاژاوەگێڕانەکانی سیخۆڕەکانی رژیمی کۆماری ئیسلامی ئێران بن.
بە بڕوای کۆمیتەی ناوەندی یەکێتی شۆڕشگێڕانی کوردستان، تەنها رێگای پێشگرتن لە کردەوە تیرۆریستی و ئاژاوەگێڕی دەزگا سیخۆڕییەکانی رژیمی ئێران، پاراستنی یەک ریزی و قەبوڵکردنی ئەنجامی هەڵبژاردنەکانی پاڕڵمانی باشووری کوردستانە، رەچاونەکردنی ئەو هەلوومەرجە بەرانبەرە بە لە دەستچوونی، هەلوومەرجی باش و لەباری باشووری کوردستان .
بژی کورد
پایدار بێت کوردستان
کۆمیتەی ناوەندی
یەکێتی شۆڕشگێڕانی کوردستان
19/4/2014